Nahitsy ary mazava ny hevitr’ireo fikambanana maromaro, raha nihaona tamin’ny mpanao gazety, mahakasika ny hoe mety hiverenan’ny fitrandrahana indray ataon’ny Base Toliara. « Atsaharo ny firaisan-tsikombakomban’ny olom-boafidy amin’ny orinasa avy any ivelany mba hanaovana tery vaimanta ny fokonolona voakasika hanaiky ny tetikasa fitrandrahana mampidi-doza Base Toliara izay efa nolaviny ankitsirano hatramin’izay », hoy izy ireo niombom-peo. Fikambanana izay nahitàna ny teo anivon’ny « Centre de Recherches et d’Appui pour les Alternatives de Développement – Océan Indien » (Craad-OI), ny mpiaron’ny zon’olombelona sy ny tontolo iainana avy eo anivon’ny Miaro Aina Zon’Olombelona Tontolo Iainana (Mazoto), ny Fikambanan’ny Masikoro Arivolahy (FIMA), ny « Femmes en Action Rurale de Madagascar » (Farm) ary ny « Réseau des Jeunes pour le Développement Durable » (RJDD).
Tsapan’izy ireo mantsy fa niova sy nivadika ireo olom-boafidy sy manam-pahefana any an-toerana ka hambarany ho « mpanera sy mpikolikolim-pifandraisan’ity orinasa mpitrandraka ity ». Hany ka manjary voatampim-bava sy tsy misy miheno ny feon’ireo solon-tenam-pokonolona izay manohitra ity tetikasa ity, hoy hatrany izy ireo. Izany toe-javatra ataon’ireo tompon’andraikitra izany dia azo adika tsotra ho « fanitsakitsahina ny zon’ny mponina fa indrindra loza manambana ny antom-pivelomany sy ny zony amin’ny tany, ny rano, ary ny tontolo iainana madio, mahasalama sady maharitra ». Manao antso avo amin’ny Filoham-pirenena sy ireo manam-pahefana araka izany izy ireo mba hihenoana ny feon’ireo mponina sy ny hampanajana ny zony. Mitaky ihany koa fandraisan’andraikitra amin’ny fanampiana azy ireo amin’ny fomba sahaza ho fampandrosoana ny seha-pihariana ivelomany amin’ny fambolena sy fiompiana ary jono nentim-paharazana.